புலிப்பூச்சாண்டி காட்டும் அரசியல்வாதிகள்

Asia Cup 2018 Live Streaming

பிறப்பு : - இறப்பு :

Mahinda-RM

கடந்த காலங்களில் நாட்டின் எந்தப் பகுதியில் குண்டு வெடிப்புச் சம்பவங்களோ அன்றேல் அசம்பாவிதங்களோ இடம்பெற்றாலும் உடனடியாகப் புலிகள் மீதே குற்றச்சாட்டுகளை முன்வைப்பது சர்வசாதாரணமான விடயமாக இருந்தது.

அதேபோன்று தமது எதிரிகளுக்கு புலி முத்திரை குத்தி பழி தீர்ப்பதும் உண்டு. இதனை அரசியல்வாதிகள் தொடக்கம் சகல தரப்பினரும் தமக்கு சாதகமாகப் பயன்படுத்திக் கொண்டனர்.

எந்தச்செயலை வேண்டுமானாலும் இலகுவாக மேற்கொண்டு விட்டு இறுதியில் புலிகளின் கணக்கில் போட்டுவிட்டால் அது தொடர்பில் எவரும் கேள்வி கேட்க மாட்டார்கள் என்பதை இவர்கள் நன்கு அறிந்து வைத்திருந்தனர்.

புலிகள் மீது பெரும்பான்மைச் சிங்கள மக்கள் கொண்டுள்ள வெறுப்புணர்வை சாதகமாக்கிக் கொண்டே அரசியல்வாதிகள் பலரும் இவ்வாறே தமது அரசியல் நிகழ்ச்சி நிரல்களை முன்னெடுத்து வந்தனர்.

மக்களால் நிராகரிக்கப்பட்ட மற்றும் அரசியலில் வங்குரோத்து நிலைமைக்கு ஆளான அரசியல்வாதிகள் கூட தமது குறைந்தபட்ச இருப்பை தக்கவைத்துக் கொள்ளவும் அன்று புலிகளே தேவைப்பட்டனர்.

எனினும் புலிகளின் அஸ்மனத்திற்குப் பின்னரும் இன்றும் புலிகளின் வாலை விடாது பிடித்திருக்கும் நலைமையை பார்க்கும் பொழுது இந்த நாட்டில் பெரும்பான்மை சிங்கள மக்களை எந்தளவு தூரம் முட்டாளாக்க முனைகிறார்கள் என்பது வெட்டவெளிச்சமாகத் தெரிகின்றது.

யுத்தம் முடிவுக்கு வந்ததைத் தொடர்ந்து தமிழ் மக்களும் சிங்கள மக்களும் தமக்கிடையில் மிகுந்த நல்லுறவைப் பேணி வருகின்றனர். வடக்கிலிருந்து தெற்கிற்கும் தெற்கிலிருந்து வடக்கிற்கும் பல்லாயிரக் கணக்கான தமிழ் சிங்கள மக்கள் பயணித்து வருவதுடன் தங்கள் வர்த்தக நடவடிக்கைகளையும் மேற்கொண்டு வருவது குறிப்பிடத்தக்கது.

இவ்வாறான சூழ்நிலையில் மீண்டும் புலிப்பூச்சாண்டி காட்டும் ஒரு சில அரசியல்வாதிகளைப் பார்க்கும் பொழுது மிகவும் பரிதாபகரமாகவே உள்ளதாகக் கூறும் தமிழ் மக்கள், எதற்காக அவர்களை நிராகரித்தார்கள் என்பதைக்கூட உணரும் திராணியற்றவர்களாகவே காணப்படுகின்றனர் என்றும் கூறுகின்றனர்.

குறிப்பாக மலேஷியாவில் இலங்கைக்கான மலேஷியத் தூதுவர் இப்ராஹிம் அன்சார் மீது அண்மையில் கோலாலம்பூர் விமானநிலையத்தில் வைத்து மேற்கொள்ளப்பட்ட தாக்குதல் சம்பவம் பலரின் கண்டனத்திற்கு உள்ளாகியிருந்தது.

எதிர்க்கட்சித் தலைவர் இரா.சம்பந்தன் இதனைப் பகிரங்கமாகவே கண்டித்திருந்தார். மேலும் குறித்த சம்பவத்துடன் தொடர்புடைய குற்றவாளிகளுக்கு எதிராக கடுமையான நடவடிக்கைகள் எடுக்கப்படுவதோடு அவர்கள் இலங்கையர்களாக இருக்கும் பட்சத்தில் அவர்களுக்கு எதிராக இலங்கை உரிய நடவடிக்கை எடுக்கப்பட வேண்டும் எனவும் வலியுறுத்தியிருந்தார்.

அதேவேளை மலேஷியாவுக்கான இலங்கை உயர்ஸ்தானிகர் மீது தாக்குதல் நடத்திய அடிப்படைவாத பிரிவினைவாதக் குழுவினையும் வடக்கு மக்களையும் ஒருபோதும் இணைத்து சிந்திக்கக்கூடாது என்று ஜேவிபியின் தலைவரும் எதிர்க்கட்சி பிரதம கொறடாவுமான அனுரகுமார திசாநாயக்க எம்.பி கடந்த செவ்வாய்க்கிழமை சபையில் வலியுறுத்தியிருந்தார்.

ஆகவே மேற்படி பிரிவினைவாதத் தாக்குதலானது இலங்கையின் ஒற்றுமையைக் குலைக்கும் நோக்கம் கொண்ட அடிப்படைவாதக் குழுக்களின் வேலையாகும். இதை இராஜதந்திர ரீதியில் கையாள அரசாங்கம் நடவடிக்கை எடுக்க வேண்டும் என்றும் அவர் தெரிவித்திருந்தார்.

இது தொடர்பில் பிரதமர் ரணில் விக்ரமசிங்க சபையில் உரையாற்றுகையில் மலேஷியாவுக்கான இலங்கைத் தூதுவர் கோலாலம்பூர் விமானநிலையத்தில் வைத்து தாக்கப்பட்டதை தாம் வன்மையாகக் கண்டிப்பதாகவும் நாம் தமிழர் கட்சியின் மலேஷியக் கிளையினரே இந்தத் தாக்குதலை மேற்கொண்டிருந்தனர் என்றும் இலங்கைத் தமிழர்கள் எவரும் இந்தச் சம்பவத்துடன் தொடர்புபடவில்லை எனவும் தெரிவித்திருந்தார்.

நிலைமை இவ்வாறிருக்க மலேஷியாவில் முன்னாள் ஜனாதிபதி மகிந்த ராஜபக்ச மீதான எதிர்ப்பு நடவடிக்கையின் பின்னணியில் தமிழ் தேசியக் கூட்டமைப்பு மற்றும் இடம்பெயர் புலிகள் உள்ளதாகத் தெரிவித்துள்ள முன்னாள் பாராளுமன்ற உறுப்பினர் ஏ.எச்.எம். அஸ்வர் வடக்கில் இன்னமும் விடுதலைப் புலிகள் இருப்பதாகக் கூறியுள்ளார்.

பத்தரமுல்லையில் அமைந்துள்ள முன்னாள் ஜனாதிபதி மகிந்த ராஜபக்சவின் அலுவலகத்தில் கடந்த புதன்கிழமை இடம்பெற்ற கூட்டு எதிர்க்கட்சியின் செய்தியாளர் மாநாட்டில் கலந்துகொண்டு உரையாற்றுகையிலேயே அவர் இவ்வாறு தெரிவித்துள்ளார்.

தொடர்ந்து கருத்து தெரிவித்துள்ள அஸ்வர் வடக்கில் இன்னமும் புலிகள் செயற்படுகின்றனர். வடமாகாண சபைக்குள் நிலைமை மிகவும் மோசமாக உள்ளது. சிவாஜிலிங்கம் போன்றவர்களின் செயற்பாடுகள் கண்டிக்கத்தக்கவையாகும்.

எவ்வாறாயினும் சர்வதேசத்தில் தஞ்சமடைந்துள்ள விடுதலைப் புலிகளை அழிக்க நடவடிக்கை அவசியம் என்றும் கூறியுள்ளார்.

மகிந்த சார்பு கூட்டு எதிர்க்கட்சியினர் அவர் சார்பு அரசியல்வாதிகள் தொடர்ந்தும் தமிழ் சிங்கள் மக்கள் மத்தியில் பிரிவினைகளை ஏற்படுத்தும் வகையிலும் நல்லிணக்கத்திற்கு ஊறு விளைவிக்கும் வகையிலும் பெரும்பான்மைச் சிங்கள மக்கள் மத்தியில் தமிழ் மக்கள் தொடர்பில் பொய்ப் பிரசாரங்களை முடுக்கி விடுவது புது விடயமல்ல.

யுத்தத்தின் பின்னணியில் வெகுவாகப் பாதிக்கப்பட்ட தமிழ் சமுதாயம் இன்னுமே தலைநிமிர முடியாது தவிக்கும் நிலையில் எந்தவிதமான மனச்சாட்சியும் இல்லாமல் மொட்டைத் தலைக்கும் முழங்காலுக்கும் முடிச்சுப் போடுவது போன்று புலிகளை சம்பந்தப்படுத்தும் போக்குகளை இந்த நாட்டு மக்கள் இனிமேலும் அங்கீகரிப்பார்கள் என்று எவரும் எண்ணுவார்களேயானால் அது மிகவும் மடைத்தனமான செயற்பாடகவே இருக்கும் என்பதில் சந்தேகமில்லை என்பதே பொதுவான அபிப்பிராயமாகும்.

புலிகளை வைத்தே அரசியல் ஆதாயம் தேடிய காலம் மெல்ல மலையேறி விட்டது என்பதை பேரினவாத சக்திகள் கடும்போக்காளர்கள் உணர்ந்து கொளவது அவசியமாகும்.

மாறாக வெறுமனே புலிப்பூச்சாண்டி காட்டும் ஒரு சில அரசியல்வாதிகளின் நடவடிக்கைகள் அவர்களை மேலும் அரசியலின் சூனிய நிலைக்கே கொண்டு செல்வதாக இருக்கும்.

கடந்த காலங்களில் இனவாதத்தைக் கிளறிவிட்டு அதில் குளிர்காய்ந்த அரசியல்வாதிகளுக்கு அதிலிருந்தும் விடுபட முடியாதுள்ளமையை அவர்களின் செயற்பாடுகளிலிருந்து பகிரங்கமாகவே தெரிவதாக மக்கள் மிகுந்த விமர்சனம் தெரிவிக்கின்றனர்.

இன்றைய அரசு இனங்களினிடையே நல்லிணக்கத்தையும் கருத்தொருமைப்பாட்டையும் கட்டியெழுப்பத் தம்மாலான அனைத்துப் பங்களிப்பையும் மேற்கொண்டு வருகின்றது. அதனை நாட்டு மக்களும் சர்வதேசமும் வெகுவாகப் பாராட்டுகின்றனர்.

இதனைச் சகிக்காத ஒரு சில அரசியல்வாதிகளும் கடும்போக்காளர்களுமே இவ்வாறு அனாவசிய பொயப்பிரசாரங்களை மேற்கொண்டு இனங்களுக்கிடையே பிரிவினையை வளர்க்க முனைகின்றனர்.

இந்த நாட்டு மக்களைப் பொறுத்தவரையில் அவர்கள் அரசியல் ரீதியாக மிகவும் தெளிவான நிலையில் இருந்தாலும் கூட கடும்போக்காளர்களின் இத்தகைய செயற்பாடுகள் இனங்களுக்கிடையே ஒருவரையொருவர் சந்தேகக் கண்ணுடன் பார்க்கும் சூழ்நிலையை ஏற்படுத்தி விடலாம். இது தொடர்பில் மக்கள் அவதானமாக இருக்க வேண்டும்.

இந்நிலையில் சிறுபான்மை மக்களே கடும்போக்காளர்களின் ஒரே குறியாக உள்ளனர். குறைந்த பட்சம் தமிழ் முஸ்லிம் மக்களின் ஆதரவு தேவையென அவர்கள் நினைத்திருப்பார்களேயானால் இவ்வாறு இந்த நாட்டு சிறுபான்மை இனங்களைப் புறமொதுக்கும் வகையிலும் அவர்களின் மனிதாபிமான பிரச்சினைகளை மலினப்படுத்தும் வகையிலும் கருத்துக்களைக் கூறி அவர்களை நோகடிக்கும் செயற்பாடுகளில் ஒருபோதும் ஈடுபட்டிருக்க மாட்டார்கள் என்பதே யதார்த்தம்.

தொடர்ந்தும் இதே வகையான தவறுகளை அவர்கள் மேற்கொள்வார்களேயானால் அவர்களின் அரசியல் எதிர்காலம் மறுபுறம் கேள்விக்குறியாகவே இருக்கும் என்பதில் சந்தேகமில்லை.

http://www.kathiravan.com/?page_id=1302

Leave a Reply

Your email address will not be published. Required fields are marked *

*

Share with your friends










Submit